Бугарски научник доби престижна награда за придонес во фундаменталната физика

Д-р Константин Гиздов, доктор на физичките науки, заедно со неговите колеги од Европската организација за јадрени истражувања (ЦЕРН) во Швајцарија, ја добија престижната награда „Пробив во фундаменталната физика“ за 2025 година. Наградата ја доделува фондацијата Breakthrough, јавува БТВ.

„Живееме во време кога науката веќе не е осамено патување, туку масовно човечко достигнување. Денешните откритија не се дело на поединечен гениј, туку на илјадници умови обединети од една заедничка цел – да ги разберат најдлабоките тајни на Вселената. Експериментот LHCb во ЦЕРН е пример за тоа како, кога луѓе и технологии од целиот свет работат заедно, успеваме да ги допреме прашањата што некогаш биле незамисливи. Колку подлабоко навлегуваме во природата на реалноста, толку поголеми стануваат мистериите, а тие можат да се решат само заедно“, изјави д-р Гиздов во интервју за bTV.

Експериментот, во кој учествува и бугарскиот научник, е награден за прецизни мерења во областа на Хигс бозонот, откривање на нови честички и истражувања на асиметријата помеѓу материјата и антиматеријата во Вселената. Хигс бозонот, познат и како „Божествена честичка“, е фундаментален дел од структурата на универзумот, а неговото постоење беше потврдено во 2013 година од страна на тимовите во ЦЕРН.

Д-р Гиздов и неговиот тим работат на проучување на разликите помеѓу нормалната материја и антиматеријата, со цел да се објасни зошто нашата Вселена е доминирана од материја.

„Во експериментот LHCb, рамо до рамо со колеги од целиот свет, комбинирајќи ги нашите научни и технолошки вештини, љубопитноста и страста кон науката, се обидуваме да ја откриеме тајната за тоа зошто Вселената ја претпочита материјата наместо антиматеријата“, додава научникот.

Во ЦЕРН моментално работат над 100 бугарски научници.