Бугарски туристи повредени во судир на автобус и камион кај Едрене

Бугарски државјани се повредени во сообраќајна несреќа меѓу туристички автобус и товарен камион во Турција. Автобусот, кој превезувал патници од Русе за Истанбул, удрил во тежок товарен камион што се движел пред него во близина на градот Едрене.

Пред неколку минути, од превозничката компанија за Бугарското национално радио (БНР) соопштија дека испратиле автобус за да ги преземе патниците.

Претходно, бугарскиот генерален конзул во Едрене, Радослава Кафеџиска, соопшти дека четворица повредени се задржани за следење на нивната состојба — тројца во Државната болница „Мурат Први“ и еден во Универзитетската болница на Тракискиот универзитет.

Хоспитализираните не се во животна опасност. Тие ќе бидат отпуштени уште денеска.

Несреќата се случила околу 01:30 часот, на шестиот километар од патот Капикуле – Едрене. По добиената пријава, на местото на несреќата биле испратени повеќе полициски и медицински екипи.

Во автобусот патувале двајца возачи и 51 турист со бугарско државјанство.

Засега не се познати причините за несреќата.