Бугарскиот европратеник Ивајло В’лчев ја известил Европската служба за надворешно дејствување поради одбиениот влез на бугарски претставници во Србија

Бугарскиот европратеник Ивајло В’лчев испратил писмо до Европската служба за надворешно дејствување, поради одлуките на српските власти да не им дозволат влез во Србија на претставници на Научниот институт „Западни покраини“, јавува БТА.

На 10 октомври српските власти не му дозволиле влез на претседателот на Институтот, доц. д-р Ангел Џонев, и му врачиле официјална забрана за влез. Во август слична мерка била применета и кон д-р Валентин Јанев, член на Управниот одбор на Институтот.

В’лчев побарал случаите да бидат поставени пред српските власти, да се побараат конкретни објаснувања за причините за ограничувањата и ЕЕАС да преземе дејства во рамките на своите надлежности.

Според европратеникот, случаите отвораат прашања за слободата на изразување, академската слобода, заштитата од дискриминација и правото на бугарската заедница во Србија да го зачува својот национален и културен идентитет.

Џонев патувал во Србија за да учествува во одбележувањето на 28 години од основањето на Културно-информативниот центар „Босилеград“. На граничниот премин „Рибарци“ му бил врачен документ за одбивање влез, во кој како причина е наведена „закана за националната безбедност“.