Бугарскиот министер за економија Пулев: Бугарија и САД имаат потенцијал за нови партнерства во одбраната и високите технологии

Бугарија и САД можат да ја продлабочат економската и индустриската соработка преку заеднички проекти во одбраната, високите технологии и вселенската индустрија, напиша вицепремиерот и министер за економија, инвестиции и индустрија на Бугарија, Александар Пулев, во објава на Фејсбук.

Повод за објавата беше неговото присуство на балот по повод годишнината од основањето на Корпусот на маринците на САД.

„Бугарија и САД се стратешки партнери и сојузници во НАТО, но нашите односи имаат потенцијал да се развиваат уште поактивно и во економската и индустриската сфера“, истакна Пулев.

Тој ги посочи одбраната, високите технологии и вселенската индустрија како области во кои двете земји можат да ја надградат соработката со конкретни заеднички проекти.

Пулев наведе дека пред неколку недели бил во посета на САД, каде што биле одржани низа средби со претставници на американската администрација и водечки компании од одбранбениот и високотехнолошкиот сектор.

„Работиме за добрите билатерални односи да ги претвориме во нови инвестиции и долгорочни индустриски и технолошки партнерства“, порача тој.

Во објавата Пулев му се заблагодари на вршителот на работите во Амбасадата на САД во Бугарија, Мартин Макдауел, за поканата да присуствува на балот, нагласувајќи дека му било чест да биде дел од настанот.