Бугарско народно пеење во програмата на фестивалот „Voices on the Move“ во Гент
Првото издание на фестивалот „Voices on the Move“ ќе се одржи од 27 до 29 ноември 2026 година во белгискиот град Гент. Фестивалот е посветен на човечкиот глас и неговата улога во традиционалната музика ширум светот. Преку песната луѓето раскажуваат приказни, изразуваат чувства и го зајакнуваат чувството на припадност кон заедницата. Бугарија е една од петте земји чие вокално наследство ќе биде претставено во тридневната програма, јавува БНР.
Меѓу виртуозите од различни музички жанрови ќе настапат и двајца претставници на бугарската народна музика – проф. д-р Бинка Котетерова-Добрева и хармоникашот Александар Рајчев.

Бинка Добрева и Александар Рајчев (фото: БНТ)
Народната пејачка Бинка Добрева е една од истакнатите претставнички на пејачката традиција на тракиската фолклорна област во Бугарија. Со својот глас оставила белег во историјата на светски познатиот хор „Мистеријата на бугарските гласови“, со кој е поврзана од 1989 година. Родена е во селото Роза, во околината на Јамбол, во семејство со традиција во народната музика. Првите песни ги научила од својата мајка.
Се школувала во Музичкото училиште во Котел и на Академијата за музичка и танцова уметност во Пловдив, а потоа станала членка на ансамблот „Филип Кутев“. Со хорот „Мистеријата на бугарските гласови“ гостувала на пет континенти и настапувала на реномирани сцени, меѓу кои „Карнеги хол“ и „Линколн центар“ во Њујорк, „Кенеди центар“ во Вашингтон и „Ројал фестивал хол“ во Лондон.
Добрева изградила и успешна солистичка кариера. Објавила албуми со традиционални тракиски песни и современи авторски композиции, а како музички педагог им го пренесува своето знаење на младите генерации. Од 2010 година во нејзиното родно село Роза се одржува национален натпревар во народно пеење што го носи нејзиното име.
Александар Рајчев е бугарски музичар, композитор, хармоникаш и гајдаџија кој истражува нови начини за сценско претставување на народната музика, зачувувајќи ја нејзината врска со традицијата. Тој раководи со сопствен фолклорен оркестар и е долгогодишен соработник на Бинка Добрева, со која изградил успешна заедничка музичка кариера.
Рајчев е композитор и аранжер на песните од шест нејзини албуми, меѓу кои „Модерни звуци од минатото“, „Со либе шега не бива“, „За сиромашни и богати“ и „Цвеќиња од Тракија“. Во својата работа тој го спојува препознатливиот звук на традиционалните бугарски инструменти со современи музички техники и на тракиската народна песна ѝ дава нов сценски израз.
Во петок, на 27 ноември, во 19:30 часот, Добрева и Рајчев ќе настапат на музичкиот настан „International Lange Zangtafel“, посветен на традиционалното пеење. Настанот ќе се одржи во Домот на музичарите во Гент (Muzikantenhuis, Dampoortstraat 52, 9000 Gent).

Бугарското народно пеење во програмата на фестивалот во Гент (фото: Фејсбук / Voices on the Move)
Во сабота, на 28 ноември, во 19:00 часот, бугарските музичари ќе настапат на концертот „Masters on the Move“ во познатата концертна и театарска сала „Трефпунт“ (Trefpunt Concertzaal, Walter De Buckplein 5, 9000 Gent).
Програмата вклучува и две практични работилници на 28 и 29 ноември, посветени на бугарските народни песни и божиќните традиции во Бугарија.
Организаторите имаат цел „Voices on the Move“ да прерасне во фестивал што ќе се одржува секоја година во Гент.
