Црковен празник на Светите рамноапостоли и просветители Кирил и Методиј
Бугарската православна црква денеска им оддава чест на Светите рамноапостоли Кирил и Методиј – творците на бугарското писмо, јавува БНР.
Двајцата браќа беа прогласени за светци заради популаризацијата на Библијата на старобугарски јазик, како и за ширењето на христијанството. Во 1980 година, папата Јован Павле Втори ги прогласи за патрони на Европа, заедно со Свети Бенедикт.
„Светите браќа Кирил и Методиј сакаа бугарскиот народ да има писмо, бидејќи божествените служби во Бугарија се вршеа на грчки јазик, а тие ги преведоа евангелските книги на бугарски јазик. Така тие го воспоставија бугарскиот систем на пишување. Во Бугарија нивни ученици беа примени од светиот цар Борис Михаил Крстител и така Бугарија доби свое писмо, образование и култура“, вели Илија Симеонов, свештеник во Видинската епархија.
11 мај се слави како црковен празник на Светите браќа, додека 24 мај е утврден како светски празник на бугарското образование и култура и на словенското писмо.
Универзитетот Велико Трново го слави патрониот празник. Ректорот професор Христо Бонџолов последен пат во двата мандата ја пречека академската заедница. Благослов даде Великотрновскиот митрополит Григориј, а концерт ќе одржат студенти од катедрата „Музичка педагогија“.
Денот е и празник на градовите Ловеч и Шумен.
Националната библиотека „Св. Кирил и Методиј“ го слави и својот патронен празник. Во текот на денот голем броj настани се одржуваат и во Библиотеката на град Софија.
