ЕУ ги продолжува санкциите против Русија за уште шест месеци
Земјите-членки на Европската Унија се согласија да ги продолжат санкциите против повеќе од 2.500 руски граѓани и организации, меѓу кои и претседателот Владимир Путин, соопштија европски дипломати, пренесува БГНЕС.
Амбасадорите на 27-те земји членки го одобрија решението пред истекот на рокот во понеделник, откако Унгарија и Словачка ги повлекоа своите барања за бришење на одредени лица од „црната листа“, изјавија извори кои сакаа да останат анонимни.
„Токму што ги продолживме нашите санкции против Русија,“ напиша на социјалната мрежа Х високата претставничка на ЕУ, Каја Калас, цитирана од АФП. Таа додаде дека Брисел во моментов ја финализира работата на нов пакет санкции, кој ќе вклучува „дополнителни ограничувања на продажбата на руска нафта, сенчести танкери за транспорт на нафта и банки“.
„Ќе продолжиме да го запираме финансирањето на војната на Путин,“ нагласи Калас.
Санкциите се обновуваат на секои шест месеци и ќе беа прекинати следната недела доколку не беше постигнато новото договорено продолжување.
