Европскиот парламент: Северна Македонија да го спроведува договорот со Бугарија во согласност со Преговарачката рамка

Северна Македонија треба да продолжи со добросовесното спроведување на Договорот за пријателство, добрососедство и соработка со Бугарија, како и на Преспанскиот договор со Грција, во согласност со Преговарачката рамка, се наведува во стратегијата за проширување на ЕУ, усвоена денес од Европскиот парламент, јавува БГНЕС.

Во документот европратениците нагласуваат дека проширувањето треба да остане процес заснован на заслуги, при што напредокот на секоја земја кандидат зависи од реалното исполнување на критериумите и вредностите на Европската унија. Ниту една држава не смее да биде разгледувана како дел од пакет и не може да има „кратки патишта“ кога станува збор за основните принципи на Унијата.

Европскиот парламент повторно ја нагласува важноста од отворањето и објавувањето на комунистичките историски архиви, со цел да се поттикнат потрагата по вистината и помирувањето и да се зајакне демократското управување. Европратениците исто така ја истакнуваат потребата од целосно спроведување на одлуките на националните и меѓународните судови, почитување на меѓународните обврски во однос на воените злосторства и исчезнатите лица, како и спротивставување на славењето на воени злосторници и на историскиот ревизионизам.

Во документот се нагласува дека пристапот заснован на заслуги може да доведе до замрзнување или дури и враќање назад на преговорите за пристапување, доколку има отстапување од основните вредности на ЕУ. Преговорите можат да бидат обновени само по доволен напредок во реформите. Европратениците посочуваат дека земјите кандидатки кои заостануваат во однос на демократското управување треба да ги сносат последиците, за процесот на проширување навистина да остане заснован на заслуги.

Во исто време Европската унија треба активно да ги поддржува демократските институции во земјите кандидатки, со цел да се зајакнат стабилноста и реформскиот импулс.

Стратегијата го определува проширувањето како стратешки одговор на променливата геополитичка средина и како клучна инвестиција во безбедноста и стабилноста на ЕУ.

Авторот на извештајот, европратеникот Петрас Ауштрјавичјус, нагласи дека во услови на денешните предизвици моделот на европска интеграција треба да се подобри, за подобро да ги одразува интересите на Унијата и очекувањата на земјите кандидатки.

„Проширувањето на ЕУ мора да оди рака под рака со внатрешни реформи кои ќе го заштитат функционирањето на Унијата и ќе го подобрат процесот на донесување одлуки, вклучително и преку поширока употреба на гласањето со квалификувано мнозинство. ЕУ треба да ги заврши овие реформи до моментот кога водечките земји кандидатки ќе ги исполнат критериумите за членство и ќе бидат подготвени за пристапување“, изјави Ауштрјавичјус.

Во документот се наведува дека Црна Гора и Албанија поставиле амбициозни цели за завршување на преговорите за членство, соодветно до крајот на 2026 година и 2027 година. Европратениците ја повикуваат ЕУ да ги охрабрува овие држави кога нивните амбиции се поддржани со реални реформи.

Се наведува дека најзагрижувачките тенденции и отстапувањето од демократските стандарди продолжуваат во земјите од процесот на проширување со најнизок степен на усогласеност со Заедничката надворешна и безбедносна политика на ЕУ, како и во државите чии преговори за членство практично се во застој, особено Србија, Грузија и Турција.