Фестивалот „Неизгазена патека“ со премиера на творба посветена на праведникот на светот Димитар Пешев
Фестивалот за камерна музика „Неизгазена патека“ ќе го одржи своето осмо издание од 29 јули до 8 август во пет дестинации — Ковачевица, Добриниште, Гоце Делчев, Карпачево и Тројан, јавува БНР.
Фестивалот е основан од пијанистката Лора Чекоратова, која живее во Њујорк. Централен настан оваа година ќе биде светската премиера на нова камерна творба посветена на Димитар Пешев, кој одиграл клучна улога во спасувањето на бугарските Евреи за време на Втората светска војна.
Премиерата ќе се одржи на 1 август во Ковачевица, во изведба на Брит Хјуит – сопран, Георги В’лчев – виолина, Анет Артинјан – виолончело и Лора Чекоратова – пијано.
Делото е напишано по нарачка од Дејвид Лудвиг, декан и раководител на катедрата за композиција на конзерваториумот „Џулијард“ во Њујорк.
„Оваа композиција е медитација за темите загуба, паметење и преживување – во спомен на членови на моето семејство кои загинале или успеале да избегаат за време на Втората светска војна. Верувам дека денес повеќе од кога било треба да им оддадеме почит не само на оние што загинале, туку и на оние што избрале да ѝ се спротивстават на омразата“, вели Лудвиг.
На фестивалот ќе бидат изведени уште две светски премиери — клавирен квинтет врз традиционални бугарски фолклорни теми од Пенка Кунева и мултидисциплинарно дело за две виолини и камерен ансамбл од Петар Керкелов.
Во рамки на програмата ќе биде создадена и нова резидентска програма во Ковачевица за млади композитори, а ќе бидат претставени и дела од Добринка Табакова. Меѓу гостите музичари се најавени виолинистката Бела Христова, флејтистот Марк Спаркс и кларинетистот Карин Дорнбуш.
