Фон дер Лајен: Романија е клучен столб на европската безбедност

Претседателката на Европската комисија, Урсула фон дер Лајен, при посетата на Констанца и воената база „Михај Когалничану“ ја пофали стратешката улога на Романија во обезбедувањето на источната граница на НАТО, јавува БГНЕС. Таа истакна дека земјата „помага во одржувањето на безбедноста на Европа во воздушниот простор и водите на Црното Море“ и ја нарече „клучен актив за европската сигурност“.

Фон дер Лајен нагласи дека Романија покажала импресивна отпорност на дезинформации и е цврст поддржувач на Украина и Молдавија. Таа ги претстави и новите обврски на ЕУ во одбраната – пакет од 800 милијарди евра до 2030 година, со инструментот SAFE вреден 150 милијарди евра, на кој веќе се приклучи Букурешт.

Од своја страна, претседателот Никушор Дан истакна дека Романија е во „срцето на безбедносната архитектура на Црното Море“ и најави големи проекти во Констанца и Когалничану. Тој потенцираше дека офшор гасните проекти што стартуваат во 2027 ќе ја зајакнат енергетската сигурност на регионот и предложи планираниот европски центар за безбедност во Црното Море да биде лоциран токму во Констанца.

Посетата беше прва на Фон дер Лајен по стапувањето на функција на Дан, кој подвлече дека „европската солидарност е одлучувачка во овие сложени времиња“.