Григор Димитров ќе биде амбасадор на Светското првенство за спортисти со Даунов синдром во Софија

Најуспешниот бугарски тенисер Григор Димитров ја прифати поканата да биде лице и амбасадор на едeн од најинспиративните спортски настани – Светското првенство за спортисти со Даунов синдром, што ќе се одржи од 13 до 19 јуни 2026 година во Софија. Во тие денови, бугарската престолнина ќе се претвори во град на силата, духот и волјата, јавува БГНЕС.

За првпат Бугарија ќе биде домаќин на толку значаен форум – натпреварување што ќе ги собере најталентираните спортисти со Даунов синдром од целиот свет во пет спортови: атлетика, ритмичка гимнастика, спортска гимнастика, тенис и пинг-понг.

Григор Димитров ја презеде улогата со голема одговорност и верба во каузата. Како амбасадор, тој ќе биде гласот и инспирацијата на овие извонредни спортисти, кои со секој свој чекор и секоја победа докажуваат дека вистинската сила лежи во срцето и карактерот.

Вчера Димитров се сретна и со единствениот бугарски тенисер со Даунов синдром – Пламен Павлов од Јамбол. Под раководство на својата тренерка Тања Лахтева, Пламен веќе тренира посветено за да ја брани честа на Бугарија на светската сцена.

Организатор на првенството е Федерацијата за адаптирана физичка активност – Бугарија, со претседател Слав Петков, под покровителство на светската организација SUDS, која гарантира највисоки стандарди и еднакви услови за сите атлети.

Бугарија ќе има можност да покаже дека може да биде достоен домаќин на спорт од највисока класа. Со поддршката на Григор Димитров и со силата на стотици спортисти, шампионатот во Софија ветува да стане незаборавен миг во историјата на спортот во Бугарија и пошироко.