Хамас ги ослободила сите израелски заложници

Хамас ги предаде 20-те живи израелски заложници како дел од договорот за прекин на огнот, постигнат со посредство на американскиот претседател Доналд Трамп. Во замена, Израел ќе ослободи речиси 2000 лица задржани во неговите затвори, јави АФП, пренесува БГНЕС.

Во Тел Авив, илјадници граѓани кои се собраа во поддршка на семејствата на заложниците, ја дочекаа веста за првите ослободувања со солзи и песни. Радоста, сепак, беше проследена со тага поради оние кои не преживеале.

Предавањето се случи во моментот кога Трамп пристигна во Израел за кратка посета пред патувањето во Египет, каде ќе учествува на мировен самит за Газа. Претседателот претходно ја прогласи војната за „завршена“.

Според израелската армија и службите за безбедност, „седум заложници се предадени на Црвениот крст и се на пат кон силите на ЦАХАЛ и Шин Бет во Појасот Газа“. Подоцна, државната телевизија, повикувајќи се на официјален израелски извор, соопшти за ослободување на уште 13 лица.

Претставник на Црвениот крст за Times of Israel изјави дека заложниците се „во добра состојба“.

Освободените се: Елкана Бобот, Авинатан Ор, Јосеф-Хаим Охана, Евијатар Давид, Ром Браславски, Сегев Калфон, Нимрод Коен, Максим Херкин, Ејтан Хорн, Матан Зангаукер, Бар Куперштајн, Давид Кунио и Ариел Кунио.

Заложниците моментално се транспортираат од Црвениот крст до израелските војници во Газа. Тие потоа ќе бидат ескортирани надвор од Ивицата до воен објект близу Реим, каде ќе им биде извршен медицински и психолошки преглед и ќе се сретнат со своите семејства.

Ова е првпат од 2014 година Хамас да не држи живи заложници.

Израел соопшти дека не очекува сите тела на убиените заложници да бидат вратени денес. Според договорот, Хамас треба да ги предаде телата на 27 заложници кои загинале или биле убиени во заробеништво, како и останките на израелски војник убиен во конфликтот од 2014 година.

Во замена, Израел ќе ослободи 250 лица притворени по безбедносни причини — меѓу нив и многумина осудени за убиство на израелски граѓани — како и околу 1700 лица задржани во Газа за време на војната.

Саудискиот канал Al-Hadath јави дека телата на дел од загинатите заложници ќе бидат предадени на Црвениот крст во текот на попладнето, без да се наведе точниот број.

Израел потврди дека најмалку 26 заложници се мртви, додека Хамас призна дека може да има потешкотии во пронаоѓањето на некои од телата.