Изложба на бугарскиот уметник Здравко Денев во Будимпешта

Изложба на бугарскиот уметник Здравко Денев ќе биде отворена на 9 септември во Будимпешта, каде што пред унгарската публика ќе бидат претставени 26 негови дела, од кои 15 се создадени во последните две години, јавува Actualno.com.

Поставката ќе биде изложена пет недели на булеварот „Андраши“ 14, а ја организираат Бугарскиот културен институт во Будимпешта, Унгарско-бугарската стопанска комора и Друштвото на Бугарите во Унгарија.

Изложбата го претставува препознатливиот уметнички свет на Денев, во кој се испреплетуваат надреалистички фантазии, гротеска, многубројни детали и мотиви на „криви огледала“.

Авторот експериментира со исклучително детални цртежи со молив, кои ги комбинира со апстрактни акварелни површини, создавајќи композиции во кои реалноста и фантазијата постојано се надополнуваат.

„Од мал цртам, цртам и цртам, а понекогаш и си пеам. Цртањето за мене е една пријатна ‘пештера’ во која се чувствувам прекрасно“, вели Денев.

Според него, уметноста е простор во кој може да ги среди сопствените мисли и поинаку да го согледа светот.

„Животот, иако го нарекуваат прекрасен, често е арена на грди страсти, настани и човечки постапки. Не секогаш е ‘песна’. Повеќе наликува на искушение. При цртањето, пак, работите се едноставни, јасни и прекрасни, а имам и време да си ги разбистрам мислите“, вели уметникот.

Значајно место во творештвото на Денев има и литературата за деца. Тој илустрира детски книги, но создава и текстови за нив.

Според него, илустрацијата има важна улога во формирањето на естетскиот вкус, чувството за боја, погледот кон светот и смислата за хумор кај најмладите.

„Сакам да илустрирам детски книги и да комуницирам со деца. Малите човечиња се вистински и непосредни“, вели Денев.

Неговите дела, како што посочува самиот автор, често го поттикнуваат гледачот повторно да им се враќа и да бара нови детали и значења.

„Луѓето кои велат дека им се допаѓаат моите слики сакаат да ги гледаат повеќепати за да ја откријат смислата. Им посакувам успех“, вели Денев.

Уметникот изрази благодарност до Бугарскиот културен институт во Будимпешта и до Росен Ткаченко, кого го опиша како „мотор“ и „гориво“ на проектот, како и до својата ќерка, Каролина и своите починати родители.

Изложбата ќе биде отворена на 9 септември и ќе трае пет недели.