Израел ги известил САД пред да ги изврши воздушните удари врз лидерите на Хамас во Доха

Израел ја информирал администрацијата на САД пред да ги изведе воздушните удари врз високи лидери на Хамас во главниот град на Катар, Доха. Ова го соопшти претставник на Белата куќа, пренесе агенцијата АФП, јавува БГНЕС.

„Бевме информирани однапред“, изјавил американски официјален претставник под услов на анонимност, нагласувајќи дека станува збор за напад врз Катар – клучен сојузник на САД и земја која е домаќин на голема американска воена база. Израелската армија потврди дека извршила воздушни удари врз високи функционери на Хамас во Доха.

Катар остро ја осуди акцијата, наведувајќи дека цел на нападите биле објекти во кои престојуваат членови на палестинското вооружено движење. Катарската влада, која игра централна улога како посредник во напорите за постигнување примирје во Појасот Газа, соопшти дека ударите биле насочени кон домовите на неколку членови на политичкото биро на Хамас, кое има седиште токму во оваа држава.

Претставник на Хамас во Газа изјави за АФП дека нивни преговарачи биле „цел на нападите“ во Доха, но засега не е познато дали има жртви.

Израелската армија соопшти дека „веќе со години овие членови на раководството на Хамас ги водат операциите на терористичката организација, директно се одговорни за масакрот на 7 октомври 2023 година и ја организираат и водат војната против државата Израел“. Според официјален воен извор, операцијата во Доха го носела кодното име „Врвот на огнот“ и била реализирана преку воздушни удари.