Јотова: Државната агенција „Архиви“ е цитадела на бугарската меморија

Претседателката Илијана Јотова изјави дека Државната агенција „Архиви“ е „цитадела на бугарската меморија“, на свеченото одбележување на 75 години од нејзиното основање, соопшти прес-службата на претседателството, јавува 24 часа.

„Државната агенција „Архиви“ е цитаделата на бугарската меморија, која ја чува и ја пренесува бугарската историја во нашиот високотехнолошки и забрзан свет. Собирајќи ги архивите, агенцијата гради мостови меѓу генерациите, така што секоја следна генерација да го надградува своето знаење за минатото“, рече Јотова во поздравниот говор.

Претседателката ја одликуваше агенцијата со плакета „Св. св. Кирил и Методиј“ за нејзиниот придонес во зачувувањето, заштитата и популаризацијата на разновидноста на архивскиот фонд на Република Бугарија.

При доделувањето на признанието, Јотова го истакна значењето на професионалната подготовка на вработените, нагласувајќи дека начинот на кој тие ги толкуваат архивските документи влијае врз тоа како иднината ќе го оценува сегашното време.

„Вие сте луѓето на кои најмногу се потпираме бугарската меморија да не биде препишувана, од што никој не е заштитен“, им рече претседателката на вработените во агенцијата.

Како пример за богатството на архивот, Јотова го посочи откривањето писмо од Христо Ботев, за кое се сметало дека е неповратно изгубено.

„Човек само може да си замисли како овој гигантски талент, револуционер, поет, публицист го држел истиот лист хартија во своите раце, а уште поголема негова вредност е што тој додава мало парче во целиот мозаик на еден славен период од бугарската историја“, рече Јотова.

Таа како друг значаен дел од работата со архивите ги посочи личните писма, од кои, како што рече, се чита како „луѓето носат одлука да градат училишта, читалишта“.

Јотова го поздрави и стекнувањето на Институтот за историја на бугарската емиграција во Северна Америка, заедно со вредниот архив на емигрантот во САД, д-р Иван Гаџев од Гоце Делчев.

За време на церемонијата беше валидирана и поштенска марка „75 години од создавањето на државните архиви во Бугарија“.

По повод годишнината беа претставени и јубилејното издание „Бугарските архиви. Документи и луѓе“ и изложбата „Наоди на меморијата. Неочекувани архивски откритија“.