Кичевски: Арсовска никако да го реши хаосот со градскиот превоз
Повеќе од една и пол година ВМРО-ДПМНЕ ја има власта во Скопје и тоа е една и пол година на пропаѓање на градот на секое поле. Хаосот со јавниот превоз се уште трае а Данела Арсовска и ВМРО-ДПМНЕ не прават ништо за да го решат тој проблем.
Автобуските линии и натаму не се редовни, има постојана гужва во автобусите на ЈСП кои и често се расипуваат, рече на денешната прес конференција Васко Кичевски, претседател на градска организација на СДСМ – Скопје.
-Граѓаните плаќаат пенали кон ЕБОР за проектот Бас рапид транзит, а Арсовска не само што не го реализира туку не го реализира ниту ветувањето за нови 250 еколошки автобуси. Не се реализираат наследените проекти како реконструкцијата на Универзална сала и мостот на АСНОМ, а со невидено споро темпо се реализира изградбата на клучката кај Момин поток и пробивањето на Есенинова. Јавните градски претпријатија едвај функционираат затоа што Арсовска постојано ги менува директорите, градот е нечист, запустен, без перспектива. Исто е и во скопските општини предводени од ВМРО-ДПМНЕ, рече Кичевски и додаде дека нема реализација на ветените проекти, но затоа има бетонизација на зелени површини, партизација на администрацијата, задолжувања и лоши услуги за граѓаните.
