Книга за Бугарите во Извоареле ќе биде објавена на романски јазик во февруари

Книга посветена на Бугарите во романското село Извоареле се очекува да биде издадена на романски јазик во февруари оваа година. Авторка е Бианка Василе, која е со бугарско потекло и е една од основачките на новата организација на бугарското малцинство во селото, „Бугарски извори“, јавува БНР.

При гостување во пресклубот на БТА во Букурешт, Василе соопшти дека потекнува од Извоареле и дека живее во Букурешт од 15 години. Таа завршила Факултет за политички науки, работи на докторски студии по политички науки со фокус и на националните малцинства и моментално работи како новинар.

Василе посочи дека на книгата работи од пред три години и дека добила поддршка од Сојузот на банатските Бугари во Романија и од пратеникот на бугарското малцинство во романскиот парламент Георги Наков. Како највреден извор на информации ги наведе интервјуата со мештаните од Извоареле, а разговарала и со етнографи, професори и музејски работници, соработувала и со Окружниот музеј во Телеорман.

Според нејзините истражувања, Бугарите се населиле во регионот пред околу 200 години, бегајќи од Османлиската империја. Наведе дека првично главно одгледувале зеленчук, а подоцна и памук, коноп и цвекло, при што меѓу селата се вршела размена. Мештаните од Извоареле биле познати како трудољубиви и често биле меѓу првите во статистиките, а во селото постоело уверување дека кој сака вредна сопруга треба да се ожени со Бугарка од Извоареле. По 1990-тите, дел од луѓето и понатаму одгледуваат зеленчук, кромид, лук и лубеници и ја продаваат стоката на пазарите во Букурешт.

Иако денес многумина се иселени, населението е застарено, а земјиштето е дадено под аренда, Василе истакна дека Бугарите во Извоареле секојдневно зборуваат на бугарски јазик, кој ја зачувал својата дијалектна форма од пред половина век.