Копнените сили на бугарската армија се претставија достоинствено на мултинационалната вежба „Agile Spirit – 25“ во Грузија

Леснопешадискиoт вод од 2-ра Тунџанска механизирана бригада на бугарската армија го заврши успешно своето учество на мултинационалната воена вежба „Agile Spirit – 25“, која се одржа во Заедничкиот центар за обука и оценување на Грузиската армија во Грузија, јавува БГНЕС.

Војниците од 42-от механизиран баталјон на 2-та механизирана бригада учествуваа во заеднички теренски активности со одбранбена тематика, како и во реални борбени стрелби. Тие дејствуваа како дел од комбинирана рота формирана за целите на вежбата, заедно со единици од вооружените сили на Грузија и Молдавија.

„Agile Spirit – 25“ се организира под раководство на Командата на Копнените сили на САД во Европа и Африка, во соработка со грузиските вооружени сили, а од 2015 година активно учествуваат и земји-членки на НАТО, како и партнерски држави.

Оваа година, во вежбата беа вклучени околу 2.000 воени и цивилни учесници од вкупно 12 држави и воени структури. Целта на „Agile Spirit“ е унапредување на интероперабилноста, зголемување на борбената подготвеност и продлабочување на соработката меѓу сојузничките и партнерските армии.