Kривична пријава против членка на Судски совет за сторено кривично дело „измама во службата“

На 15 септември 2025 година, Единицата за корупција при Секторот за криминалистички истраги во Одделот за сузбивање на организиран и сериозен криминал, заедно со Одделот за криминалистичка полиција, до Основното јавно обвинителство Скопје поднеле кривична пријава против Л.Г. (57) од Струмица. Таа се сомничи за сторено кривично дело „измама во службата“ по член 355 став 1 во врска со став 2 од Кривичниот законик.

Според пријавата, Л.Г., во својство на службено лице и член на Судскиот совет на Република Северна Македонија, во периодот од 26 август 2022 до 15 јануари 2024 година, со прикривање на промени во имотната состојба на нејзиното потесно семејство, незаконски остварувала надомест за патни трошоци.

Иако нејзината ќерка во 2022 година се стекнала со стан во Скопје, пријавената не го пријавила тоа навреме до претседателот на Судскиот совет. Наместо тоа, продолжила да користи патни трошоци како да патува секојдневно од Струмица до Скопје и назад.

Во наведениот период, на Л.Г. ѝ бил исплатен надомест за патни трошоци во 15 наврати, во вкупен износ од 291.040 денари. Со тоа, таа се стекнала со противправна имотна корист на штета на буџетот на Судскиот совет.

Случајот сега е во надлежност на Основното јавно обвинителство – Скопје.