КвАРТал Фестивал слави 10 години – три дена култура и уметност во срцето на Софија

КвАРТал Фестивал оваа година одбележува јубилеј – 10 години постоење, еднa деценија во која овој настан ја врати животната енергија во еден од најубавите делови на градот Софија. Од 12 до 14 септември 2025 година, стариот дел на бугарската престолнина ќе се претвори во пешачка зона исполнета со култура, уметност и инспиративни приказни, јавува БГНЕС.

Во рамки на фестивалот ќе бидат активни над 60 локации со сцени за музика, изложби, работилници, тури и разговори. За јубилејното издание, организаторите ја продолжуваат каузата за создавање пешачки центар во стара Софија – со времено затворање на делови од улиците „Веслец“, „Екзарх Јосиф“, „Сердика“ и „Триадица“ за автомобилски сообраќај, по примерот на многу европски градови.

Акцентот годинава е ставен на бугарскиот архитектонски модернизам и зградите од меѓувоениот период. На 11 септември, во Мраморната сала на Домот на киното, ќе биде отворена изложбата на фотографот Иван Шишиев („Етидите на Софија“). На 12 септември, во Cable Depot во зоната на Женски пазар, ќе се претстави британскиот уметник Чарли Вард со уникатни инсталации. Следниот ден ќе се одржи специјален тур низ модернистичките згради, а на 14 септември ќе има јавна дискусија за темата.

Во недела, 14 септември, галеријата „Сариева“ ќе организира тур низ модернистичката зграда DOT Sofia, проследена со архитектонски работилници, дегустации и музика.

Посетителите ќе имаат можност секојдневно да учествуваат во историски тури со „скриени приказни“, да откријат повеќе за најстарото дрво во Софија, за историјата на Пожарната и реставрацијата на емблематичниот мурал „Внатрешна светлина“ на уметникот Иво Илиев – YETO, да го посетат еврејското наследство и Синагогата, како и графитите на Sofia Graffiti Tour.

Улицата „Веслец“ ќе оживее како мал „Париз“ благодарение на ателјеата на бугарските дизајнери и студентите по моден дизајн од Нов бугарски универзитет, кои ќе ја претстават својата прва колекција пред широка публика.

Празникот ќе биде збогатен со изложби, графити, жива музика, свинг танци и диџеи на винил, кои ќе го претворат центарот на Софија во вистинска сцена на уметноста и културното наследство.

Од 12 до 14 септември старата Софија ќе биде место каде што минатото и иднината се среќаваат – во чест на 10 години КвАРТал Фестивал.