„Мајка Тереза“ на Теона Митевска ја доби наградата за најдобар балкански филм на „Софија филм фест“

Филмот „Мајка Тереза“ на Теона Митевска ја доби наградата за најдобар балкански филм на „Софија филм фест“, јавува БНР.

„Правењето кино е колективна работа, затоа им благодарам на целиот тим што работеше на создавањето на филмот, на сите мои блиски, на брат ми, на целото мое семејство, бидејќи оваа вечер е нешто уникатно“, изјави Митевска.

Филмот „Диригентот“ на чешкиот режисер Ондржеј Провазник ја доби главната награда на „Софија филм фест“ (СФФ). Церемонијата на 30. Меѓународен филмски фестивал „Софија филм фест“ се одржа синоќа во сала 1 на НДК, а признанието го објави унгарскиот режисер и претседател на жирито Ѓерѓ Палфи.

Според него, „наградата се доделува за силното и вистинито изразување на скриени реалности, исклучително чувствителната и прецизна режија, внимателно избраниот актерски состав, суптилните, но длабоко впечатливи изведби и богатото, емоционално и автентично пресоздавање на времето и атмосферата што филмот ги обработува“.

Режисерот Провазник изјави дека работата на филмот (Чешка–Словачка) била голем предизвик: „Имав многу среќни, но и многу тешки моменти, бидејќи филмот обработува теми кои не се воопшто лесни и се засновани на реалноста. Потоа дојдоа првите средби со публиката – тие беа длабоко возбудливи, позитивни, но понекогаш и контрадикторни… но без оглед на сите тешкотии и последователни радости, сум исклучително среќен што стигнав до денешниот ден“.

Наградата за најдобар тинејџерски филм ја доби „Атлас на универзумот“ на Паул Негоеску. „Ова е нашиот трет заеднички филм – прекрасен, многу човечки и многу деликатен“, изјави продуцентката Поли Ангелова.

Младинското жири за најдобар филм ја избра „Ќерката на кондорот“ на Алваро Олмос Торико, кој ја доби и специјалната награда на жирито. „Наградата на публиката“ ја освои „Нина Роза“ на Женвиев Дулуд де Сел. „Големо задоволство е што оваа награда оди кај ‘Нина Роза’…“, изјави директорот на Националниот филмски центар Петар Тодоров, додека продуцентот Николај Мутафчиев рече: „Иднината е во наши раце и не треба да ја пуштаме“.

За најдобар бугарски филм беше прогласен „Жени надвор од употреба“ на Александар Косев. „Многу сум возбуден, благодарение на операторот Михаил Јанакиев имаме навистина убав филм“, изјави Косев.

Наградата на бугарските филмски критичари за филм од Балканскиот конкурс ја доби „Made in EU“ на Стефан Командарев, кој рече: „Благодарам на целиот тим и на СФФ што постои и е дел од нашиот живот“.

„Лисица под розова месечина“ на Мехрдад Оскуеи ја освои специјалната награда за документарен филм, додека „Трилион“ на Виктор Косаковски беше прогласен за најдобар документарен филм. Наградата за бугарски краткометражен филм ја доби „Балконада“ на Ива Токмакчиева.

„Благодарам на СФФ за можноста да го прикажеме филмот, најмногу ѝ благодарам на продуцентката Весела Данчева“, изјави Токмакчиева.

Актерката Марија Петрова доби почесна диплома за улогата во „Држи се за мене“, а Ралица Петрова беше наградена за режија за филмот „Луст“.