Марија Габриел се сретна со американскиот државен секретар Ентони Блинкен
Вицепремиерката и министерка за надворешни работи на Бугарија Марија Габриел се сретна со американскиот државен секретар Ентони Блинкен. Билатералната средба се одржа во Вашингтон во рамките на втората сесија од стратешкиот дијалог меѓу Бугарија и САД, соопшти Министерството за надворешни работи на Република Бугарија.
„Поддршка, координација и заеднички одговор на предизвиците“ – ова се пораките од мојата средба со американскиот државен секретар Ентони Блинкен. Ви благодарам за топлото добредојде како вицепремиер на Бугарија. Нашата земја е стратешки партнер, важен сојузник и пријател“, коментира Марија Габриел.
„Охрабрува успешното одржување на втората сесија од стратешкиот дијалог меѓу Бугарија и САД и нашите заеднички приоритети засновани на демократски вредности и почитување на меѓународниот правен поредок. Потпишувањето на Меморандумот за разбирање меѓу Бугарија и САД за спротивставување на странската манипулација со информации е од клучно значење во средина на засилени хибридни напади и дезинформации“, нагласи вицепремиерката.
„Во конструктивен и добронамерен дух, во рамките на стратешкиот дијалог, идентификувавме заеднички пристапи кон глобалните и регионалните проблеми. Имаме и конкретни намери за проширување на соработката на полето на економијата, иновациите и енергетиката. Исто така, ќе работиме заедно на заштита на демократијата и зајакнување на владеењето на правото. Билатералните односи ќе имаат за цел да бидат во интерес на граѓаните на двете земји“, резимира Марија Габриел.
