Милотинова: Се надеваме дека ќе бидеме одлични домаќини на „Евровизија 2027“ во Бургас

Бугарската национална телевизија се надева дека Бургас ќе биде успешно домаќин на „Евровизија 2027“ и дека настанот ќе ги претстави талентите, природните убавини, историјата и гостопримството на Бугарија, изјави генералната директорка на БНТ, Милена Милотинова, во емисијата „Денот започнува“, пренесува БТА.

„Се надеваме дека ќе организираме прекрасно домаќинство на ‘Евровизија 2027’ во Бургас, кое ќе го покаже целиот талент на Бугарија, сите убавини на нашата земја и целото наше гостопримство“, рече Милотинова.

Според неа, Бугарија треба да покаже дека може да организира настан од таков обем, каков што досега немала.

Милотинова наведе дека „Евровизија 2026“ ја следеле 131 милион гледачи во светот, а во 2027 година публиката би можела да биде поголема, бидејќи ќе учествува и Канада. Таа додаде дека процесот на утврдување на земјите учеснички сè уште трае и дека конечниот број ќе биде познат по истекот на рокот за пријавување.

Според генералната директорка на БНТ, организацијата на натпреварот е можност Бугарија да ги претстави и својот иновативен бизнис, природните убавини и историјата.

„Станува збор за имиџот на нашата земја, за брендот Бугарија“, рече Милотинова.

Таа нагласи дека „Евровизија 2027“ нема да биде еднодневен настан, туку ќе вклучува и повеќе придружни активности. Според неа, организацијата ќе бара многу работа, но Бугарија има потенцијал да биде домаќин на настан од таков размер.