Министерството за иновации и раст на Бугарија ќе инвестира речиси 310 милиони евра во модернизација на бизнисот во 2026 г.
Министерството за иновации и раст на Бугарија ќе инвестира речиси 310 милиони евра во модернизација на бугарскиот бизнис во 2026 година преку пет мерки од Програмата „Конкурентост и иновации во претпријатијата“. Средствата се наменети за зајакнување на индустрискиот капацитет, развој на чисти и ресурсно ефикасни технологии и воведување поеколошки производствени модели, јавува БГНЕС.
Ќе се отвори мерка од 70,6 милиони евра за компании што произведуваат производи за одбрана или со двојна намена, достапна за сите категории претпријатија. Во јануари стартува и програма од 96,3 милиони евра за нови производствени модели, при што значителен дел е насочен кон послабо развиените региони на Северна Бугарија.
Дополнително, 28,6 милиони евра се предвидени за компании од локални иницијативни групи, 30 милиони евра за развој на чисти технологии од критично значење, а речиси 83 милиони евра за зелени инвестиции преку интегрирани територијални инвестиции, вклучително и опрема, машини и специјализиран софтвер.
