„Мистеријата на бугарските гласови“ ќе отвори фолклорен фестивал во Даблин
Легендарниот бугарски женски хор „Мистеријата на бугарските гласови“ ќе настапи во Националната концертна сала (National Concert Hall) во Даблин, Ирска, на 25 септември 2025 година. Веста за концертот ја пренесе Бугарската телеграфска агенција (БТА), повикувајќи се на информации од бугарската амбасада во Ирска.
Настапот на реномираниот вокален ансамбл од Бугарија ќе го отвори Фестивалот на новата традиционална и фолклорна музика што ќе се одржи во ирската престолнина.
На сцената, пејачките од „Мистеријата на бугарските гласови“ ќе настапат заедно со диригентот Георги Андреев, квартетот „Куарто“ (Quarto Quartet) и вокалниот квартет „Лендлес“ (Landless).
Програмата на концертот со наслов „Гласови и жици“ ќе содржи нови композиции за хор и гудачки квартет од Георги Андреев, како и специјално преработени песни од репертоарот на ансамблот, адаптирани за изведба со гудачки квартет.
„Мистеријата на бугарските гласови“ е светски познат женски хор кој изведува автентична и обработена бугарска фолклорна музика. Хорот е основан во 1952 година на иницијатива на Георги Бојаџиев, тогашен главен уредник на редакцијата „Народна музика“ при Бугарското национално радио. Светската слава ја стекнал во 70-тите години од минатиот век, кога швајцарскиот продуцент Марсел Селие ги вклучил нивните снимки во албумот Le Mystère des Voix Bulgares. Во 1986 година, албумот бил реиздаден од основачот на издавачката куќа 4AD, Ајво Вотс-Расел, што го направил ансамблот светски популарен и познат.
