На бугарската шахистка Нурѓул Салимова ќе ѝ биде доделена стипендија од образовната институција на која студира
„Цела Бугарија е горда на достигнувањето на Нурѓул Салимова. Уште повеќе сме горди што таа го избра нашиот универзитет за да студира овде“. Ова за БНР го изјави проф. д-р Маријана Божинова – ректор на Економската академија во Свиштов, каде што годинава Нурѓул Салимова ќе биде студент прва година на специјалноста „Маркетинг“.
Имаме академска фондација која ги поддржува нашите извонредни студенти и на академски и на спортски план, истакна таа. Според неа, тоа се прави со одлука на управниот одбор на фондацијата, а претседател е ректорот на Академијата.
Високото училиште ќе и додели стипендија на Нурѓул. Веќе на почетокот на септември ќе се состане Управниот одбор и мојот предлог ќе биде да ја поддржиме Нурѓул, додаде проф. Божинова и истакна:
„Има многу што може да се направи за овие „златни деца“ што не смееме да ги испуштиме. Таква е долгогодишната политика на нашата Академија. Мојот предлог е да има исто така специјални стипендии, бесплатни учебници и материјали, како и можност за индивидуален студиски план. Ќе разговараме и за други награди. Ќе ја очекуваме Нурѓул Салимова на свеченото отворање на учебната година – лично да ги добие овие награди. Сакам да се уверам дека откако веќе се запишала и веќе го платила првиот семестар – ќе и ја вратам сумата од моите лични средства“.
Тоа се шампиони кои сакаат да бидат шампиони и на своите студии, истакна ректорката на Економската академија. Според неа, тоа се одговорни, упорни, прекрасни бугарски млади луѓе кои се достојни граѓани на Бугарија. Мора со сите средства да ги зачуваме и да ги одржуваме да се натпреваруваат за нас, нагласува таа.
Проф. Божинова истакна и дека универзитетот располага со академски музеј со посебно катче, кое постојано се збогатува со достигнувањата на извонредните студенти спортисти. Сега ќе и доделиме такво место на Нурѓул, истакна таа.
