Набавени 80.000 вакцини против сезонски грип – бесплатна имунизација за ризичните групи
Министерството за здравство соопшти дека е потпишан договор за набавка на 80.000 вакцини против сезонски грип. Вакцините се очекува да пристигнат следната недела, а имунизацијата традиционално ќе започне во втората половина на месецот.
Оваа година е обезбеден најголем број вакцини досега. Станува збор за четиривалентна вакцина од реномираниот холандски производител „Абот“.
Бесплатната вакцинација е наменета за ризичните категории граѓани: лица над 65 години, пациенти со хронични заболувања, здравствени работници, бремени жени, деца од 6 месеци до 5 години, како и лица и вработени во установи за социјална заштита на стари лица.
Од Министерството нагласуваат дека вакцинацијата е најефикасна мерка за превенција од грип и ги намалува ризиците од потешки форми и компликации, особено кај ранливите групи на население.
