Национална конференција „Compass 2025“ во Софија: Енергетските проекти во фокус на геополитиката и националната безбедност
Во Софија денеска ќе се одржи Националната конференција „Compass 2025“ на тема: „Големите проекти во бугарската енергетика низ призмата на геополитиката, националната безбедност и дипломатијата“. Настанот е организиран од Институтот за стратегии и анализи и доаѓа во време на зголемени регионални и глобални предизвици што директно ја засегаат безбедноста, одржливоста и независноста на бугарскиот енергетски сектор, јавува БГНЕС.
Форумот има за цел да отвори експертска дискусија меѓу институциите, бизнисот и граѓанското општество за потребата од стратегиска координација меѓу политичките одлуки, геоекономските процеси и технолошкиот развој.
Во политичкиот панел ќе учествуваат премиерот Росен Желјазков, министерот за енергетика Жечо Станков, министерот за финансии Теменужка Петкова и заменик-министерот за надворешни работи Николaj Павлов. Акцентите ќе бидат ставени врз геополитичките ризици и транснационалните енергетски зависности, националните приоритети во енергетската и надворешната политика, како и предизвиците поврзани со буџетската рамка, инвестициската политика и одржливото финансирање. Посебно ќе се истакне и улогата на дипломатијата како инструмент за зајакнување на енергетската безбедност.
Во рамки на експертските панели ќе се вклучат бројни енергетски експерти. Темите ќе ги опфатат енергетската безбедност, јаглеродната неутралност и диверзификацијата на нуклеарната енергетика на Бугарија, новите иновативни проекти за развој на НЕК, придонесот на АЕЦ „Козлодуј – Нови мощности“ за одржливата енергетска иднина на земјата, улогата на 7-миот и 8-миот блок за енергетската независност, како и регионалната енергетска поврзаност и новите генерирачки капацитети кои треба да ја позиционираат Бугарија како енергетско срце на Југоисточна Европа.
Приветствени зборови на конференцијата ќе упатат потпретседателката на Бугарија Илијана Јотова и раководителката на Претставништвото на Европската комисија во Софија, Јорданка Чобанова.
