Над 140.000 демонстранти во Белград – студентските протести кулминираа со судири и барање за избори

Околу 140.000 луѓе се собраа на масовен протест во Белград, најголемиот во изминатите месеци, откако студентските демонстрации дополнително го засилија притисокот врз популистичката влада да распише предвремени избори, јави агенцијата АФП, пренесува БГНЕС.

Митингот, одржан на 28 јуни, беше кулминација на повеќемесечните протести кои започнаа во ноември, по трагедијата во северниот град Нови Сад, каде што при уривање на натстрешницата на железничката станица загинаа 16 лица – несреќа што јавноста ја припишува на длабоко вкоренета корупција.

Независниот набљудувач Архив на јавни собири го процени бројот на демонстранти на околу 140.000, значително повеќе од официјалната бројка на полицијата од 36.000. Огромната толпа го преплави најголемиот плоштад во Белград и околните улици, скандирајќи „Сакаме избори!“ и веејќи српски знамиња и транспаренти со имињата на градови од целата земја.

Студентите повеќе од шест месеци ги блокираат универзитетите и организираат масовни собири, барајќи транспарентна истрага за несреќата. Но, за разлика од претходните мирни протести, овојпат избувнаа судири со полицијата. Силите за безбедност употребија солзавец и шок-бомби, а демонстрантите возвратија со фрлање сигнални ракети.

Новинарите на АФП сведочеа за приведување на најмалку две лица, а локалните медиуми јавуваат за повеќе уапсени.

Разочарани од, како што велат, незаинтересираноста на владата да ја истражи трагедијата, студентите уште од мај повикуваат на избори.

„Повторно покажавме дека нема да се откажеме. Ќе се собираме колку што треба, додека нашите барања не се исполнат“, изјави студентот по право Стефан Ивковиќ за АФП.

Пред протестот, организаторите му дадоа „ултиматум“ на претседателот Александар Вучиќ да распише избори до 21 часот, што тој го одби уште пред истекот на рокот.

По завршувањето на протестот, организаторите објавија соопштение пред насобраните, повикувајќи ги граѓаните „слободата да ја земат во свои раце“ и најавија дека нема да се повлечат.

„Овој народ нема намера да се повлече, туку ќе стане – згазен, скршен, угнетуван – за да се избори за подобро утре“, стои во соопштението.

Министерот за внатрешни работи ги осуди нападите врз полицијата и најави апсење на сите одговорни.

Претходно, Вучиќ на социјалните мрежи објави фотографија како го посетува проправителствениот камп пред парламентот, испраќајќи порака на поддршка до контрадемонстрантите, чија бројност беше значително намалена во однос на првичните илјадници.