Несебар туристички лидер во 2025 година, секторот генерира 1,4 милијарди евра приходи

Несебар е најпосетената општина во Бугарија во 2025 година со околу 1,5 милиони туристи, покажуваат податоци за сместувачки капацитети со 10 и повеќе легла. По неа следуваат Софија со 1,3 милиони и Варна со 1,2 милиони посетители, јавува БГНЕС.

Петте најпосетени општини – меѓу кои и Пловдив и Балчик – генерираат половина од туристичкиот проток во земјата. Во топ 10 се и Велинград, Банско, Бургас, Хисарја и Самоков.

Во 2025 година приходите од ноќевања достигнале 1,4 милијарди евра, при што повеќе од половината се концентрирани во Несебар, Варна и Софија. Несебар води со 382 милиони евра, пред Варна со 252 милиони и Софија со 147 милиони.

Црноморските општини доминираат кај странските туристи – во Несебар тие сочинуваат 76%, а во Варна и Каварна по 70%. Во Софија уделот е 63%, а во Пловдив 40%.

Податоците покажуваат и силна зависност од туризмот – во Приморско секторот учествува со 56% од додадената вредност, во Несебар 55%, а во Созопол 54%.

И покрај глобалната неизвесност, туристичкиот сектор во Бугарија продолжува да расте по периодот на пандемија и брзото закрепнување.