|

Нов Зеланд ќе ги забрани мобилните телефони во училиштата бидејќи опаѓа писменоста на учениците

Владата на Нов Зеланд ќе ги забрани мобилните телефони во училиштата поради загрижувачкиот пад на писменоста, изјави конзервативниот премиер, Кристофер Луксон.

Училиштата во Нов Зеланд некогаш имаа некои од најдобрите резултати за писменост во светот, но нивоата на читање и пишување паднаа до таква мера што некои истражувачи стравуваат дека има образовна криза.

Луксон на тој начин ќе усвои политика која е тестирана со мешани резултати во САД, Обединетото Кралство и Франција. Овој потег ќе ги спречи нарушувањата во училницата и ќе им помогне на учениците да се фокусираат, рече Луксон.

„Ќе ги забраниме телефоните во училиштата. Сакаме нашите деца да учат и нашите наставници да предаваат“, рече тој.

Истражувачите од новозеландската добротворна организација Education Hub минатата година предупредија на „криза на писменоста“, откривајќи дека повеќе од една третина од 15-годишниците едвај знаат да читаат и пишуваат. Конзервативната влада на Луксон, која положи заклетва во понеделникот, веќе беше заглавена во контроверзии во првата недела на функцијата.

Прво, таа неочекувано ги укина водечките светски мерки за контрола на пушењето, кои требаше да ја забранат продажбата на цигари на сите родени по 2008 година, што лекарите го прогласија за „трагично“, а потоа се согласи да го рестартира морското истражување на нафта и гас, отфрлајќи една од најпознатите важни климатски политики на поранешната премиерка Џасинда Ардерн.



Слични Објави