Одбележуваме 135 години од раѓањето на големиот бугарски револуционер и припадник на ВМРО Владимир Куртев- прогласен од институтот „Јад Вашем“ во Израел за „праведник на светот“

Одбележуваме 135 години од раѓањето на големиот бугарски револуционер, припадник на ВМРО и праведник на светот Владимир Спиридонов Куртев.

Куртев е роден на 19 октомври 1888 година во Плевен во семејството на Спиридон Куртев, бесарабски Бугарин од Болград. Во ВМОРО го заколнал во 1905 г. неговиот наставник по физика, големиот бугарски револуционер Иван Гарванов. Куртев во 1906 станува комита во четата на Добри Даскалов, а во 1907 година веќе е во четата на Антон Чеха во Тиквешијата. Во 1907 година се запишува на студии по историја и географија на Софискиот универзитет, но ги прекинува студиите за да учествува во четничките акции на ВМОРО. Бил комита во четите на Симеон Клинчарски и Дончо Лазаров. Бил ранет во раката и се вратил на лекување во Бугарија.

Владимир Куртев повторно влегол во Македонија со четата на Михаил Чаков во есента 1911 година. На почетокот на Балканската војна во 1912 година, со четата на Георги Занков и Михаил Чаков, Куртев учествувал во ослободувањето на Банско и Сер. Подоцна служел во 11-та Серска дружина и бил награден со Орден за храброст III степен и Орден на Свети Александар VI степен.

Во 1914 година дипломирал на универзитетот „Свети Климент Охридски“ во Софија. За време на Првата светска војна служел во Првата софиска пешадиска дивизија и со неа учествувал во битката кај Тутракан и во заземањето на Букурешт. Бил одликуван со орден „За храброст“ 1 степен и бил унапреден во чин подпоручник. Бил префрлен на Јужниот фронт, каде што учествувал во борбите на Добро Поле. Неговиот брат Александар загинал на фронтот како офицер во 27. пешадиски полк во август 1916 година.

По војната, Куртев се населил во Ќустендил, каде што работел како учител и директор на машката гимназија „Марин Дринов“. Истовремено учествувал и во активностите на возобновената од Тодор Александров ВМРО. Во 1925 година Куртев бил во кочанската чета на Евтим Полски, која водела неколку битки со српската жандармерија во Вардарска Македонија. Во 1927 година Куртев бил назначен од ЦК на ВМРО за началник на граничниот пункт во Ќустендил. На VIII конгрес на ВМРО, во април 1932 година, Куртев бил избран за член на ЦК, заедно со Иван Михајлов и Георги Настев. Куртев е еден од лидерите на економската политика на ВМРО во Горноџумајско и Петричко.

По државниот удар извршен на 19 мај 1934 година, Куртев бил уапсен. По излегувањето од затвор по амнестијата во јуни 1940 година, се враќа во Ќустендил.

Куртев е дел од ќустендилската делегација која на 8 март 1943 година ја започнала кампањата за спас на бугарските Евреи. Покрај него, во делегацијата се и народниот пратеник Петар Михалев, адвокатот Иван Момчилов и трговецот Асен Суичмезов.

По државниот удар на 9 септември во 1944 година, Куртев се криел кај пријатели Евреи во Ќустендил, а потоа и во Софија. На 8 јуни 1946 година, при акцијата на комунистичката власт против членовите на ВМРО, Куртев бил уапсен и убиен без суд и судска пресуда.

Посмртно е објавен за „Почесен граѓанин на Ќустендил“ во 1997 година.

Поради неговото учество во спасувањето на бугарските Евреи, на 6 март 1997 година постхумно е одликуван со орденот „Стара Планина“, а на 5 мај 2010 година со одлука на комисијата при Државниот израелски институт „Јад Вашем“ Владимир Куртев е прогласен за „Праведник на светот“.