Осум уметници од Србија и Бугарија ќе учествуваат во 34-та Меѓународна ликовна колонија „Погановски манастир“

Во галеријата „Методи Мета Петров“ во Цариброд, на 1 август, сабота, во 19:00 часот, официјално ќе биде отворена 34-та Меѓународна ликовна колонија „Погановски манастир“, во која годинава ќе учествуваат осум уметници од Србија и Бугарија, јавува Фар.рс.

Во рамките на отворањето на ова значајно културно случување ќе бидат претставени дела од учесниците на минатогодишното издание: Милјан Миленковиќ, Лазар Живковиќ, Предраг Чомагиќ, Миролјуб Филиповиќ Филимир, Оливера Савиќ Поповиќ и Габриела Васиќ од Србија, Анатоли Ивакин и Јулија Барановскаја од Русија, Марианжела Анастасова од Бугарија и Милица Кажиќ од Црна Гора.

Организаторите и годинава подготвија богата програма, преку која учесниците ќе имаат можност да се запознаат со природните убавини и со културно-историските знаменитости на царибродскиот крај.

На годинашното издание ќе учествуваат Леда Старчева, Румен Атанасов и Антон Георгиев од Бугарија, како и Далибор Милојковиќ, Марко Вишиќ, Олга Арсиќ, Ивана Стојаковиќ и Ирена Марковиќ од Србија.

Организатор на колонијата е Културниот центар – Галерија „Методи Мета Петров“. Манифестацијата е основана во 1993 година и досега собрала уметници од речиси сите континенти. Денес таа се вбројува меѓу најзначајните културни настани во овој дел од Србија и на Балканот.

Годинашната ликовна колонија ќе се одржи од 1 до 8 август во селото Поганово.