Партијата на Хрватите во Македонија ја одржа својата промотивна конвенција

Партијата на Хрватите во Македонија (ПХМ) ја одржа својата промотивна конвенција. Настанот се одржа во свечена и достоинствена атмосфера на 15 октомври во ресторанот Рагуза во Скопје. Гости на конвенцијата беа бројни угледни гости од политичкиот и јавниот живот, меѓу кои претставници на Владата на Република Северна Македонија, амбасадорката на Хрватска во Македонија — Нивес Тигањ, која воедно е и пратеник на министерот за надворешни и европски работи Гордан Грлиќ Радман, директори на институции и членови на дипломатскиот кор.

Во своето обраќање, амбасадорката Тигањ го честиташе основањето на ПХМ и посака успех во натамошната работа, нагласувајќи:
„Хрватска и Република Северна Македонија имаат традиционално добра и пријателска соработка, заснована на заедничките европски вредности. Хрватска ѝ дава силна поддршка на Македонија на нејзиниот пат кон Европската Унија.“

Поддршка за партијата стигна и преку видео обраќања од видни претставници на хрватските заедници во регионот — Адријан Вуксановиќ, пратеник во Собранието на Црна Гора и лидер на Хрватската граѓанска иницијатива, Јасна Војниќ, пратеник во Саборот на Хрватска и претседател на Хрватскиот национален совет во Србија, која зборуваше и во име на претседателот на Саборот Гордан Јандроковиќ и претседателката на Комисијата за Хрвати вон Хрватска Здравка Бушиќ, како и европратеникот Карло Реслер.

Претседателот на ПХМ, Ненад Немет, во своето излагање ги претстави стратешките цели на новоформираната партија — зачувување и унапредување на хрватскиот идентитет, јазик и култура во земјата, како и активно учество на Хрватите во општествениот и политичкиот живот на државата.
„Хрватите се лојални граѓани кои активно придонесуваат за општествениот развој и зајакнување на демократските процеси во земјата. Важно е да градиме мостови на соработка и меѓусебно почитување меѓу различните заедници во Македонија, при што Хрватите се горд дел од мултикултурното ткиво на државата,“ изјави Немет.

Конвенцијата, како што истакна тој, претставуваше значаен чекор за понатамошно јакнење на врските меѓу хрватската заедница и институциите во Република Северна Македонија, како и нов поттик за продлабочување на соработката со Република Хрватска.