Министерот Азир Алиу со личен пример ја промовира вакцинацијата против сезонски грип во Гостивар

Министерот за здравство Азир Алиу денеска ја посети службата за епидемиологија во својот роден Гостивар, каде што се вакцинираше против сезонски грип, повикувајќи ги граѓаните да го следат неговиот пример.

„Денес сум во мојот роден Гостивар, каде се вакцинирав и преку личен пример сакам да ја истакнам важноста од навремената вакцинација, како најефикасна превентивна мерка за заштита на здравјето. Апелирам граѓаните навреме да се заштитат од сезонскиот грип, посебно ги повикувам лицата кои спаѓаат во ризични групи население да се пријават преку апликацијата vakcinacija.mk или кај својот матичен лекар,“ изјави министерот Алиу.

Според податоците на Министерството за здравство, досега околу 49.000 граѓани се пријавиле за вакцинација против сезонски грип, а само во првиот ден биле вакцинирани повеќе од две илјади лица.

„Ова е навистина голем интерес, што покажува зголемена свесност за значењето за заштита од грип, и уште еднаш ја потврдува важноста и потребата од оваа превентивна мерка. Министерството годинава набави најголем број вакцини против сезонски грип – 80.000 дози четиривалентна вакцина од реномираниот производител ‘Абот’ од Холандија,“ додаде Алиу.

Бесплатната вакцинација е наменета за ризичните категории население, меѓу кои се лицата над 65 години, хронично болните, здравствените работници, бремените жени, децата од 6 месеци до 5 години, како и лицата и вработените во установите за социјална заштита.