Патријарх Вартоломеј: Бугарија да напредува и да благоденствува во рамките на ЕУ, на која ѝ припаѓа
Вселенскиот патријарх Вартоломеј доаѓа во Бугарија со порака за црковно братство, мир и благосостојба. Во интервју пред својата тридневна посета, тој изрази уверување дека посетата, остварена на покана на бугарскиот патријарх Даниил, ќе ги зацврсти односите меѓу двете православни цркви, јавува БГНЕС.
„Уверен сум дека сè ќе помине во вистински братски дух. Посетата на Вселенскиот патријарх на сестринската Бугарска православна црква ќе остане запишана во историјата со златни букви – во прекрасните бои на пријателството и братството“, изјави патријархот Вартоломеј за БНТ.
Тој потсети на посетата на патријархот Даниил во Истанбул во декември минатата година, како и на последователната посета на неговото родно место Имврос, како примери за зацврстувањето на духовните врски меѓу двете цркви.
Вселенскиот патријарх се осврна и на значењето на историската правда при враќањето на припадноста на вредности и останки, насилно преместени во тешки историски околности.
„Кога ваквите неправди ќе бидат исправени што е можно поскоро, без да се чека со години, тоа ги зајакнува билатералните односи и придонесува за мирот и доброто разбирање меѓу народите“, нагласи тој. Патријархот Вартоломеј како пример го посочи предавањето на посмртните останки на цар Самуил на Бугарија. „Грција правилно ви ги предаде посмртните останки на цар Самуил, бидејќи тие ви припаѓаат. Тој бил ваш владетел и управник“, рече тој.
Во својата порака до бугарскиот народ, патријархот упати благослов и желби за единство, благосостојба и политичка стабилност.
„На сите чеда на Бугарската црква, без исклучок, им ги испраќам љубовта и благословот на Црквата мајка. На Бугарија ѝ посакувам да напредува и да благоденствува во рамките на Европската Унија, на која ѝ припаѓа“, изјави Вселенскиот патријарх.
