Петрова-Попшој: Бугарската заедница во Молдавија e важен фактор за зајакнување на дијалогот и соработката меѓу двете земји
Министерката за надворешни работи на Бугарија Велислава Петрова разговараше телефонски со вицепремиерот и министер за надворешни работи на Република Молдавија, Михај Попшој.
Во рамките на разговорот, министерот Попшој ѝ упати честитки на Велислава Петрова за стапувањето на должноста министерка за надворешни работи на Република Бугарија и ѝ посака успех во извршувањето на службените должности.
Двајцата разговараа за традиционално добрите односи меѓу Бугарија и Молдавија, изградени врз долгогодишно партнерство, силни историски и културни врски и споделени европски принципи. Акцент беше ставен врз значењето на бугарската заедница во Молдавија како важен фактор за зајакнување на билатералниот дијалог и развојот на соработката меѓу двете држави.
Министерката Велислава Петрова изрази благодарност до властите на Република Молдавија за исполнувањето на преземената политичка обврска во однос на иднината на Тараклискиот реон. Таа истакна дека предложеното решение, кое го зачувува територијалниот интегритет на реонот, надлежностите на неговата администрација и можноста за директно политичко претставување на граѓаните, создава оптимални можности за понатамошен развој на бугарското национално малцинство и целосно остварување на етнокултурните права на неговите претставници.
Првиот дипломат на нашата земја ја потврди и поддршката на Бугарија за европската интеграција на Република Молдавија и ја изрази подготвеноста на нашата држава да го сподели своето практично искуство во процесот на пристапување кон Европската Унија.
