Почнува пријавувањето за бесплатна вакцинација против сезонски грип

Министерството за здравство информира дека од денес започнува пријавувањето за бесплатна вакцинација против сезонски грип за ризичните категории на население. Граѓаните може да се пријават електронски преку апликацијата vakcinacija.mk
или преку својот матичен лекар.

Со оваа кампања се опфатени следните категории:

лица постари од 65 години,

лица со хронични заболувања,

здравствени работници,

бремени жени,

деца на возраст од 6 месеци до 5 години,

лица сместени во установи за социјална заштита на стари лица и вработените во нив.

Министерот за здравство, д-р Азир Алиу, истакна дека интересот за бесплатната вакцинација секоја година расте, што е показател за зголемената свесност за значењето на заштитата од грип.

„Ги повикувам сите граѓани, особено оние од ризичните групи, навремено да го заштитат своето здравје. Министерството годинава набави рекорден број од 80.000 дози четиривалентна вакцина против сезонски грип од реномираниот производител ‘Абот’ од Холандија“, рече Алиу.