Помош за најранливите семејства за набавка на инвертер клими
Најранливите домаќинства ќе добијат финансиска поддршка за набавка на инвертер клима-уреди, со цел да ги намалат трошоците за електрична енергија и затоплување. Министерството за енергетика објави јавен оглас преку кој граѓаните можат да аплицираат за добивање клима-уред со моќност од 3.5 киловати и енергетска класа најмалку А+.
Право на аплицирање имаат домаќинства кои се во енергетска сиромаштија, односно чии месечни приходи во последната година не ги надминале:
- 25.000 денари за едночлено,
- 31.000 денари за двочлено,
- 37.000 денари за трочлено и
- 43.000 денари за четиричлено или поголемо домаќинство.
Овие семејства може да добијат помош во износ од 25.000 до 35.000 денари.
Дополнително, право на финансиска помош ќе имаат и пензионерски семејства со минимални месечни приходи до:
- 15.700 денари за едночлено,
- 19.800 денари за двочлено,
- 23.700 денари за тричлено или поголемо домаќинство.
Овие категории може да добијат поддршка од 10.000 до 20.000 денари.
Помошта не важи за домаќинства приклучени на системот за парно греење, како и за оние кои веќе користеле субвенции за клими или печки на пелети.
Рокот за аплицирање е 60 дена од објавувањето на огласот. За оваа мерка се издвоени 170 милиони денари, а сите информации и обрасци се достапни на веб-страницата на Министерството за енергетика.
