Популарни личности во Бугарија ќе станат дел од хуманитарната иницијатива „Подари поддршка“

Популарни бугарски јавни личности застануваат зад хуманитарната иницијатива „Подари поддршка“, која собира средства за кризен центар за лица погодени од семејно насилство. Организатори на иницијативата се Fragment и фондацијата „П.У.Л.С.“, јавува БГНЕС.

Михаела Филева, Катерина Евро, Галена, Александар Кадиев, Ивелина Чоева, Маги Томова, Глорија Петкова, Никол Андонова – Nikyoto, Марија Пеева (Мама Нинџа) и Надја Брајд донираат лични предмети, книги, облека, уметнички дела и други артикли, кои ќе бидат понудени на продажба за време на хуманитарен базар во поддршка на „Куќа сон“ – името на идниот кризен центар.

Настанот ќе се одржи на 20 и 21 декември на булеварот „Георги С. Раковски“ 96. Меѓу акцентите е и хуманитарна аукција за плакат со автограм од Димитар Бербатов, обезбеден специјално за иницијативата.

Покрај познатите личности, иницијативата е поддржана и од бројни бизниси со донации од различен карактер, кои ќе бидат реализирани за време на настанот. Посетителите ќе имаат можност да купат ваучери за спа-услуги и сместување во спа-хотели, третмани за нега на кожа, козметички производи, облека, прехранбени и здравствени додатоци, накит од злато и сребро, како и ваучери за здравствени и естетски услуги.