Претседателот Радев во Берлин: Германија е стратешки сојузник и водечки економски партнер на Бугарија
Германија е стратешки сојузник и водечки економски и инвестициски партнер, а дијалогот на највисоко ниво е клучен за зајакнување на довербата во сите области од заеднички интерес. Ова го изјави бугарскиот претседател Румен Радев пред новинарите во Берлин по средбата со неговиот колега, претседателот на Сојузна Република Германија, Франк-Валтер Штајнмаер, јавува БГНЕС. Двајцата лидери одржаа тет-а-тет средба во претседателската палата „Белвју“ во германската престолнина, по што следуваа разговори меѓу делегациите на двете земји.
Радев е во работна посета на Германија, каде што вчера, на покана на извршниот директор на „Рајнметал“, Армин Папергер, присуствуваше на свеченото отворање на високотехнолошки погон на германскиот одбранбен концерн.
На средбата на Радев и Штајнмаер биле разгледани можностите за продлабочување на економската и инвестициската соработка во области како енергетика, одбранбена индустрија, високи технологии и иновации, како и актуелни теми од дневниот ред на Европската Унија.
„Политиката треба да води и до конкретни практични придобивки“, истакна Радев, додавајќи дека претседателската институција активно работи на привлекување странски инвестиции преку директен дијалог со германскиот бизнис. Како пример тој ја посочи инвестицијата на „Рајнметал“ во Бугарија и најави зголемување на германските вложувања во сектори како авионска индустрија, електрична мобилност, електроника, енергетика и интелигентни системи за безбедност и одржлив развој.
Претседателот потсети дека за време на годинашната Минхенска конференција за безбедност имал разговори со Федералната асоцијација за економски развој и надворешна трговија на Германија, како и со компанијата „Aerotech“, која учествува во производството на „Airbus“. Според него, почетокот на следниот месец делегација на „Aerotech“ ќе ја посети Бугарија за разгледување на можностите за отворање производство.
„Претседателската институција повторно ќе организира средби со бугарскиот бизнис и Владата. Очекувам сите да ја искористат шансата максимално, без тие визити да се претвораат во ПР кампања за одредени политички лидери. Треба да се работи“, нагласи Радев.
Германија е најголемиот надворешнотрговски партнер на Бугарија, а во 2024 година билатералната размена надмина 12,3 милијарди евра. Најважни извозни производи од Бугарија кон Германија се машини и опрема, електроника, текстил, хемиски производи и храна, додека увозот вклучува автомобили, машини, електронски компоненти, хемикалии и стоки за широка потрошувачка.
Вкупните директни германски инвестиции во Бугарија до јануари 2024 година достигнаа 4,109 милијарди евра, при што водечки сектори се автомобилска индустрија, машиноградба, трговија, електроника и електротехника.
