Прием за бугарската заедница по повод националниот празник на Бугарија – Трети март во Даблин
Прием за бугарската заедница по повод националниот празник на Бугарија – Трети март се одржа во Амбасадата на Бугарија во Даблин. Ова го соопшти дипломатската мисија на Бугарија во Ирска на веб-страницата на Министерството за надворешни работи на Бугарија, пренесува БТА.
Во своето обраќање пред гостите, амбасадорката на Бугарија во Ирска Вања Андреева-Малакова изјави дека Трети март е олицетворение на сокровениот идеал на генерации Бугари за слободна, обединета и независна Бугарија, се наведува во соопштението.
За време на настанот беше истакнато дека 148 години по Ослободувањето Бугарија зазема трајно место во Европската унија, во која бугарските граѓани ги користат слободите на движење на луѓе, стоки, услуги и капитал. Беше нагласено и дека бугарскиот идентитет наоѓа поширок простор за претставување и развој, вклучително и благодарение на активната дејност на бугарските заедници во странство.
Во рамките на културната програма беше отворена изложбата „Ова се Будителките на Бугарија“, претставена од Преслава Фентам-Флечер од фондацијата Будителките, која е автор на експозицијата. Изложбата раскажува приказни за Бугарки кои придонеле за позитивни општествени промени по Ослободувањето.
Експозицијата беше отворена во пресрет на Меѓународниот ден на жената – 8 март и може да се разгледа до средината на април 2026 година пред зградата на бугарската дипломатска мисија во Даблин.
Гостите на приемот имаа можност да добијат мартеници и да слушнат бугарски и европски музички дела во изведба на сопраното Анастасија Инис и виолистката Стелјана Недева.
Според информациите од Амбасадата, на 3 март претседателот на Сенатот на Ирска, сенаторот Марк Дејли, ja поздравил амбасадорката на Бугарија Вања Андреева-Малакова во Леинстер Хаус по повод националниот празник. Во своето обраќање тој ги истакнал историските врски меѓу Бугарија и Ирска, вклучително и поддршката на новинарот Џејмс Баучер за бугарската национална кауза, како и развојот на билатералните односи и партнерството меѓу двете држави во рамките на Европската унија.
