Процесот за оценка на статусот на Српската напредна партија во ЕНП сè уште трае

Претседателот на Европската народна партија (ЕНП), Манфред Вебер, изјави дека процесот на оценка на статусот на Српската напредна партија (партијата на претседателот Александар Вучиќ) во рамките на ЕПП сè уште е во тек, јавува БГНЕС.

Според Вебер, ова прашање било разгледувано оваа недела и ќе биде повторно ставено на дневен ред на 23 октомври во Брисел.

„Го почнуваме процесот и внимателно следиме што се случува во Србија. Оваа недела имавме состаноци со претставници од политичкиот живот и од граѓанското општество. Тоа е добар почеток – ги слушаме и се интересираме за состојбата во земјата. Водевме долги и интензивни разговори со нив, а потоа ќе дојде моментот да разговараме и со претставници на партијата во Брисел. Не одолговлекуваме ништо – гледаме на ова прашање сериозно и итно“, изјави Вебер за телевизијата N1.

Тој додаде дека не може да го коментира можниот исход од процесот, бидејќи тој сè уште трае.

„Генералниот секретар на партијата и потпретседателите се занимаваат со ова прашање и потоа ќе поднесат извештај до Претседателството на ЕПП. Значи, процесот веќе е започнат и јас го сметам за многу важен“, нагласи Вебер.

Во однос на предложената резолуција на Европскиот парламент за Србија, за која се тврди дека никогаш досега не била толку остра, Вебер потенцираше дека ставот на ЕПП е добро познат.

„Што се однесува до резолуцијата, знаете дека нашиот став отсекогаш бил одбрана на владеењето на правото и проевропски пристап. Убеден сум дека ќе се најде добар и избалансиран пристап – и во однос на вашата земја, и во однос на очекувањата што ги има овој парламент“, изјави тој.