Прототипот на бугарското национално знаме, ќе биде изложен во Воениот музеј на Бугарија за националниот празник 3 март

На 3 март Националниот военоисториски музеј во Софија ќе го изложи оригиналното знаме – прототип на денешното бугарско државно знаме, еден од највредните симболи на државноста. Светињата, која ретко го напушта фондот на музејот, ќе биде експонирана специјално и само на бугарскиот националниот празник, кога Музејот ќе работи со вообичаеното работно време од 10.00 до 17.00 часот, со влезни такси.

За првообраз на современото државно знаме се смета трибагреникот, проектиран од Иван Параскевов, изработен од неговата ќерка Стилијана и наменет за бугарските ополченски дружини во Руско-турската војна. На 8 мај 1877 г. тие го предаваат знамето на главнокомандувачот на руската Дунавска армија со молба да го врачи на некоја од ополченските дружини. Тоа, меѓутоа, не се случува поради несакањето на руската команда Бугарското ополчение да има сопствени знамиња со бугарска симболика. Знамето никогаш не се развиорило во борба, но судбината му одредува непредвидена вечност како првообраз на бугарскиот државен флаг.

Тоа е едно од првите знамиња кај кои боите бела, зелена и црвена се подредени во истата последователност како во подоцна прифатеното бугарско национално знаме. Токму оваа последователност го добива своето законско утврдување во 1879 г., кога Основачкото собрание го усвојува член 23 од Трновската конституција, кој пропишува: „Бугарското народно знаме е во три бои и се состои од бела, зелена и црвена боја, поставени хоризонтално.“ Се смета дека токму знамето на Стилијана послужило како инспирација при формулирањето на овој текст. Боите и нивниот редослед остануваат непроменети во бугарската државна симболика до денес.