Првите пожарникари од Бугарија заминаа за Грција да помагаат во гасењето на големите пожари во земјата

Дваесет пожарникари од Главната дирекција за противпожарна заштита и заштита на населението денеска заминаа од Благоевград кон Грција, каде ќе помогнат во справувањето со големите шумски пожари, јавува БНР.

Мисијата се спроведува во рамките на Механизмот за цивилна заштита на Европската унија и ќе трае до крајот на јули.

Со три противпожарни возила и целосна опрема, првата група пожарникари, предводена од главниот инспектор Сотир Лазаров, тргна утрово во 10 часот. На граничниот премин „Кулата“ модулот ќе биде пречекан со ескорт од грчките служби и ќе биде распореден во регионот на Солун.

Инструкции и желби за успешна и безбедна работа им упати заменик-директорот на дирекцијата, старши комесар Љубомир Баров.

„Доколку е потребно, ќе учествуваат во реално гасење на пожарите. На 16 јули е предвидена замена на екипите, а целата мисија ќе трае до 30 јули“, изјави Баров.

Тој додаде дека, ако во текот на мисијата состојбата со пожарите во Бугарија се влоши, пожарникарите ќе бидат итно вратени:

„Како што се случи минатата година – модулот беше повлечен и прераспореден таму каде што беше најпотребно“, рече Баров.

Во моментов во Бугарија нема сериозни пожари, но противпожарните екипи се во целосна готовност поради најавените високи температури во следните десет дена.

На прашањето на БНР дали постои опасност да останат сами во борбата со шумските пожари поради најавените протести на шумарските служби, Баров одговори:

„Се надевам дека нема да останеме сами, а од наша страна ќе се преземат сите потребни мерки.“