Радев: Бугарија го занемаруваше прашањето за правата на Бугарите во РСМ, ние не поставуваме нови услови, сакаме да се исполнат досегашните

Сметам дека секој бугарски политичар и јавна личност кој се соочува со европските прашања и темата за местото на РСМ во нив мора многу јасно да сфати дека државните позиции мора да се градат врз основа на објективни историски факти, на експертиза и на човековите права. Ова го изjaви бугарскиот претседател Румен Радев во своето обраќање за време на претставувањето на книгата на доц. д-р Спас Ташев „Борбата на македонските Бугари за права и самостојност – 68 случаи од периодот 1944-1994 година“, што се одржа синоќа во Националната библиотека на Бугарија “ Св. св. Кирил и Методиј“.

Бугарскиот претседател во својот говор го дефинираше занемарувањето на судбината на Бугарите во РСМ и нивните права како еден од најголемите недостатоци на Бугарија во нејзината модерна историја.

„Нив ги нема во Декларацијата за добрососедство и пријателство од 1999 година, ги нема во Договорот за пријателство, добрососедство и соработка од 2017 година, ги нема во Националната рамковна позиција од 2019 година. Кога Бугарија наметна целосно оправдано вето за почеток на преговорите за членство од крајот на 2020 година, ниту Бугарите во РСМ и нивните права не беа дел од причините. Истовремено, притисокот врз нашата земја да ги отвори вратите за почеток на преговорите енормно порасна“, потсети претседателот, додавајќи дека денеска сите зборуваат за уставни измени и еднаквост на граѓаните со бугарска самосвест во РСМ, но пред две години овој проблем бил забранета тема во комуникацијата меѓу двете земји.

Радев прецизираше дека прашањето за правата на Бугарите во РСМ го покренал и го брани не од стремеж да се разгори историски спор меѓу две балкански земји, туку како проблем што влијае на темелите на вредностите и принципите на кои е изградена ЕУ – човековите права, борбата против говорот на омраза и неговата превенција во заедничкото европско семејство.

„Ако сме одговорна земја членка на ЕУ која го почитува своето минато и сите луѓе кои ги дадоа своите животи за нашата иднина, не можеме да се откажеме од овие позиции, бидејќи тоа е чесниот став како членки на ЕУ“, рече претседателот и потсети дека Тој пред неколку дена испрати писма до сите европски лидери и институции, во кои ги објасни важните процеси од минатото, но и актуелните предизвици од сегашноста.

Пристапувањето на РСМ во Европската Унија е процес кој Бугарија го поздравува не поради геополитички фактори, објасни претседателот и потсети на историската и културната поврзаност меѓу двете земји, која трае веќе 13 века.

„Ние не поставуваме нови услови – сакаме да се исполнат досегашните. Нема шанси да имаме добрососедство со Република Северна Македонија додека гледаме фалсификување на учебници и историја, додека има тепање, дискриминација на Бугарите и подметнување пожари“, категорично изјави Радев.

Не можеме да се откажеме од овие позиции ако ја почитуваме нашата историја, заклучи Радев.