Радев ќе ги одликува историчарите проф. д-р Георги Николов и проф. д-р Петер Шрајнер со Почесен знак на претседателот
Бугарскиот претседател Румен Радев денеска ќе ги награди историчарите проф. д-р Георги Н. Николов и проф. д-р Петер Шрајнер за целосниот придонес на двајцата научници за проучувањето на средновековната бугарска историја и на Самоилова Бугарија, јавува БГНЕС.
Проф. д-р Николов ќе биде награден и за неговата улога во консолидацијата и развојот на современата бугарска историска наука и научна школа, а проф. д-р Шрајнер за придонесот во развојот на билатералните односи во областа на науката меѓу Бугарија и Сојузна Република Германија.
Доделувањето на наградата е во контекст на националното одбележување на 1010-годишнина од смртта на цар Самоил, што се одржува под покровителство на шефот на државата Румен Радев.
Академскиот пат на проф. д-р Георги Н. Николов минува низ Центарот за славистичко-византиски студии „Иван Дујчев“ и е тесно поврзан со катедрата за „Историја на Бугарија“ на Историскиот факултет на Софискиот универзитет. Во 2022 година е избран за професор на стручната област „Историја и археологија (Историја на средновековна Бугарија – Историја на Самоилова Бугарија)“.
Автор е на 10 книги и стотина научни и научно-популарни студии, статии, осврти и рецензии, со свои извештаи учествувал на над 100 научни трибини во Бугарија и во странство. Предава на повеќе теми, меѓу кои „Историја на средновековна Бугарија“ и „Историја на Самоилова Бугарија“. Професорот Николов е меѓу основачите на Здружението на византолозите во Бугарија, член е на Научниот совет на Центарот за славистичко-византиски студии „Проф. Иван Дујчев“ и е претседател на Македонскиот научен институт.
Проф. д-р Петер Шрајнер е роден во Минхен, дипломирал класична филологија и византиски студии со специјализација славистика, латинска филологија и историја и култура на Блискиот Исток. Во 1979 година станал професор по византиски студии на Универзитетот во Келн. Од 1979 до 2005 година предавал на Катедрата за византиски студии на Универзитетот во Келн. Во 1991 година, професорот Шрајнер е избран за дописен член на Австриската академија на науките, а во 2002 година за претседател на Меѓународната асоцијација на византолозите. Значаен дел од неговата повеќеслојна научна дејност зазема бугарската средновековна историја, врските меѓу Византија и Словените, како и културата од старобугарската ера. Проф.Шрајнер особено внимание посветува на владетелите на Првото бугарско царство – Борис, Симеон, Самоил и преку своите научни трудови го презентира современиот поглед врз некои од најславните страници во бугарската историја.
