Радев разговарал со претседателката на Косово Вјоса Османи по повод денешната вооружена пресметка во северниот дел на Косово
Бугарскиот претседател Румен Радев телефонски разговорал со неговата колешка претседателката на Косово Вјоса Османи по повод вооружениот напад и престрелка што се случи денеска во северниот дел на Косово.
Радев и Османи се обединија околу мислењето дека е неопходна деескалација и намалување на ризикот, јавува прес-службата на шефот на бугарската држава, пренесува БНР.
Десетици маскирани и тешко вооружени мажи се забарикадираа во православен манастир во близина на северното косовско село Бањска. Еден полицаец и тројца од напаѓачите загинаа во престрелката со косовската полиција, која трае цел ден. Тројца полицајци се повредени.
Косовскиот премиер Албин Курти ја обвини Србија за нападот во Бањска. Белград демантираше.
