РАДЕВ: РС МАКЕДОНИЈА МОРА ДА ГИ ПОЧИТУВА ПРАВАТА НА ГРАЃАНИТЕ КОИ ОТВОРЕНО ГО ИЗРАЗУВААТ СВОЈОТ БУГАРСКИ ИДЕНТИТЕТ

//

Напредокот на Република Северна Македонија кон полноправно членство во Европската Унија е стратешка цел за Бугарија. Сепак, неговото спроведување зависи од подготвеноста и политичката волја на Северна Македонија да ги исполни критериумите за членство во ЕУ и почитувањето на правата на граѓаните кои отворено го изразуваат својот бугарски национален идентитет. Ова го изјави претседателот на Бугарија Румен Радев за време на експертската дискусија за состојбата и перспективите за развој на односите меѓу Бугарија и Република Северна Македонија, што се одржа денеска на негова иницијатива.

На дискусијата присуствувале и потпретседателот Илиана Јотова, како и бугарски научници, експерти, дипломати и новинари.

Учесниците на дискусијата, како што информира дописникот на МИА од Бугарија, истакнале дека европската интеграција на сите земји од Западен Балкан е од стратешки интерес за Софија и дека тоа ќе придонесе за зајакнување на демократските процеси и унапредување на добрососедските односи и економскиот раст во целиот регион.

– За решавање на прашањата во билатералните односи меѓу Бугарија и Република Северна Македонија е потребна политичка волја, активен институционален дијалог и постигнување неповратност во градењето добрососедски односи, рече Радев.

Според бугарскиот претседател, трајното надминување на натрупаните противречности нема да се постигне само со политички декларации и затоа е неопходна комуникација и посветеност на институциите на сите нивоа, како и разум од двете страни.



Бугарија очекува нејзиниот југозападен сосед да работи на создавање на сите потребни услови за слободна економска, културна, медиумска и информациска размена од двете страни на заедничката граница.

Според експертите кои учествувале на дискусијата, од клучно значење за развојот на билатералните односи е ставањето крај на дискриминацијата против граѓаните во Република Северна Македонија, кои отворено го изразуваат својот бугарски национален идентитет.

Според учесниците во дискусијата, занемарувањето на низа аспекти од билатералниот Договор за пријателство, добрососедство и соработка од страна на Република Северна Македонија ги става под прашање изразените желби за градење добрососедски односи со Бугарија. Затоа, Бугарија треба да инсистира на гаранции во врска со почитувањето на правата на Бугарите во Република Северна Македонија, кои треба да бидат законски регулирани и спроведени во пракса, а постигнувањето на одржливи и неповратни резултати во оваа насока да стане предуслов за напредок во процесот на европска интеграција.

Претходна статија

ВО НЕДЕЛА НАУТРО ВО СКОПЈЕ ПРИСТИГНУВА ПРВАТА ПРАТКА ОД ВАКЦИНИТЕ НА АСТРАЗЕНЕКА

Следна статија

УТРЕ ПРИСТИГНУВА ПРВАТА ПРАТКА ОД 24.000 ВАКЦИНИ НА АСТРАЗЕНЕКА ПРЕКУ КОВАКС СИСТЕМОТ

Најново од Вести