Речиси секој петти вработен во бугарската бизнис-економија работи во странски контролирана компанија

Во 2023 година, 18,7% од вработените во бизнис-економијата во Бугарија работеле во претпријатија контролирани од странски компании, покажуваат податоците на Евростат. Станува збор за 411.020 лица, а уделот е за 3,2 процентни поени над просекот во Европската Унија, јавува БГНЕС.

На ниво на ЕУ, само 1,1% од претпријатијата се под странска контрола, но тие вработуваат 15,5% од работниците, создаваат 28,6% од прометот и 24% од додадената вредност.

Во Романија, уделот на вработените во странски контролирани компании изнесува 26,9%, или 1.301.612 лица. Повисоки стапки има и во Словачка со 28% и во Чешка со 27,5%.

Највисок удел е регистриран во Луксембург, каде 44,5% од вработените работат во претпријатија под странска контрола, додека во Ирска тој изнесува 27,6%.

Кај најголемите економии во ЕУ уделот е понизок — 12,1% во Германија, 11,9% во Франција и 9,9% во Италија. Во Шпанија изнесува 15,5%, колку што е и просекот на Унијата.

Евростат посочува дека странски контролираните претпријатија вообичаено се значително поголеми од домашно контролираните, поради што нивното влијание врз вработеноста, прометот и додадената вредност е поголемо од нивниот удел во вкупниот број компании.